» » رحلتي من تركيا الى بريطانيا



 اللجوء الى بريطانيا 
اتفقنا مع مهرب في ازمير منطقة بصمني على ايصالنا لليونان في بلم ١٠٠٠ يورو لجزيرة ساموس وبعد اربع ساعات بالبحر ماكنا نوصل لتلتين الطريق الا واجانا قارب حربي كبير شلحونا الجوازات والمصاري وكبو الممحرك بالبحر ورجعونا لنص البحر بالمنطقة الدولية وتركونا وبلش القارب يدخل مي ولولا لطف الله ثم الأتراك كنا متنا 

المغزى لاحدا يطلع ع ساموس لان فيها نقطة عسكرية ألمانية ع حسب كلام الناس وبعيدة كتير وخطرة والبلم خطر اذا عدد الركاب كتير مقابل عدد الأحصنة يلي مالازم تقل عن أربعين حصان . " اللجوء الى بريطانيا "

رجعنا اتفقنا مع مهرب تاني مشهور ومعروف كتير بازمير لرحلات اليخوت السريعة بألفين يورو ع جزيرة متليني وكنا ١٦ شخص كبسونا مخلل في يخت قد بخش النملة حبسي الله عليهن ..

الحمدلله وصلنا بخير وسلامة سلمنا حالنا في البورت يعني المينا وبصمونا بصمة جنائية وحطونا بالكامب يومين وطلعنا اثينا بعد حصولنا على ورقة إقامة ست شهور بعدها طرد او تجدد .
من اليونان هناك كثير من الطرق للخروج الى اروبا راح احكي باختصار عن كل طريقة .
طريق البحر كبس :
أسعارها من اربعة وتمانمية الف يورو الى خمسة وستمية يورو الى ايطاليا بيكبسوك بعلم الشوفير في الشاحنة سواء في قلب المقطورة فوق الشوفير او في القاطرة مع البضاعة ممكن تموت من البرد ورا يفضل ماتطلعو في براد تحسبا خخخخخخ وبتضل شي ٣٥ ساعة كحد أقصى مكبوس فيها مع غيرك .

طريق البحر شلف : 

أسعارها من الف الى الف وخمسمية يورو بوديك المهرب الى بلدة فيها مينا مخصص الى ايطاليا بيستلمك مهرب تاني متفق معه بصير يحاول فيك يدخلك الى المينا خفاءاً بالليل ويخبيك بشي شاحنة او تركض انت وياه خلف شاحنة امام المينا بيفتح الباب بتفوت وبيسكر عليك والاغلب بتنمسك لان مابتلحق تتخبى وفي كنترول ألماني صعب .
أنا طلعت بهاي الطريقة والحمدلله نفذت لانو دخلنا الى نص المينا بنص الليل واندحشنا بترلا واقفة من غير راس ع اساس تطلع اليوم وطلعت الصبحيات من غير تفتيش ولا بلوط والحمدلله وصلنا ايطاليا بعد طلع المينا ووقت يستريح رحنا بخشنا السطح وهربنا متل المساطيل الله لايرويكن بعد عذاب دام ٣٥ ساعة لاحركة ولا سعله ولا صوت .
اللجوء الى بريطانيا "




طريق الطيارة :

الأسعار من الفين ونص للاربعة ونص كحد أقصى وكل يلي بقلك اكتر من هيك واتفاقية مع البوليس ومع الضيفة بالطيارة كلو علاك وحتى ولو كان صحيح فوق هالاسعار جريمة تدفع لانو نحنا يلي رفعنا الأسعار ع حالنا وخربنا عالناس يلي مامعها حسبنا الله ع الجهل .

المهم بصير يحاول فيك مرة وتنتين وعشرة حتى تنتهي المهلة المذكورة بالاتفاق مع المهرب عند مكتب التأمين .
طبعا كل الطرق بتامن المصاري عند مكتب سواء السعيد او السكر او غيرو ويتحط مهله خمس ايام للطائرة وعشرة للبحر وسطيا ..

بس خلصت المهلة بحقلك تسحب مصاريك او تغير المهرب وعليك تدفع خمسين يورو للمكتب أجور التأمين ع مصاريك .

الطريق الرابع والأخير هو البر :

هاد أسعاره كل مرحلة وإلها سعرها وعلى حسب مصروفك بهالدولة ومدة الانتظار فيها لتمشي ع الدولة يلي بعدها .
وسطيا الفين وخمسمية من اليونان ع تلات دول او دولتين بتوصل صربيا بعدها بتكمل ع النمسا ومنها ألمانيا والدنمارك والسويد الخ ..
هالطريقة من اصعب الطرق كونها راح تمام بالجبال وتمشي احيانا ايام والكل بوصل انشالله بس ماحدا وصل ونصح حدا يجربها . اللجوء الى بريطانيا "

في ناس كلفتها تلاتة ونص وضلت عشرين يوم وصلت السويد وفي ناس كلفتها ستة الاف يورو وشهرين حتى وصلو حسب التوفيق ..
من ايطاليا في جمعيات بتستقبل السوريين نوم وشوية لبس وأكل محترم بتقعد بترتاح كم يوم .
بتقرر لو ع السويد او ألمانيا او الدنمارك او النرويج وغيرها بتطلع في تكاسي تتراوح أسعارها من اربعمية لامانيا الى سبعمئة للسويد.
منجي لبريطانيا يااخي الكريم .

حابب تطلع في اربع طرق معروفة .
الاول من اثينا بالطيارة مباشر ع شي مدينة بريطانيا بتكلفك من اربعة الى ست الاف يورو .
الثاني من فرنسا بالقطار ع لندن مباشر اذا معك هوية او جواز أروبي حقيقي شبيه لالك ومتقن لغة الجواز طبعا وهذا اصعب طريق لانو تدقيق فوق الوصف .
الثالث طرق المينا يلي موجودة بفرنسا او بلجيكا
بتامن المصاري في لندن في مكتب تأمين معروف!

بحدود الف ومتين بوند (الفين يورو تقريبا ) وسطيا بتضل بتحاول مع المهرب لتشبع وبس ماعجبك بتتركه .
او بتدفع كاش خمسمية يورو وسطيا بيضل يحاول فيك لتوصل انشالله وبس مليت وحبيت تغير المهرب بتروح عليك المصاري والله المستعان .

حالات النصب كتيرة ومنها هات جوالك لطالعك اليوم غرانتي يعني مضمون مية مية واذا ماطلعت انسى الجوال لان يلي بيشتغلو بهالموضوعحرامية نصابين. بدك تكون قد حالك لتتعامل معهن وممكن اذا حسيت باختناق جوات البراد واتصلت عليهن ليجو يفتحولك ممكن تسمع الف مسبه وألف وعيد بالقتل بالرصاص اذا فتحت البراد وخربت الشغل ع الشباب يلي معك .

عم حكيكن الصاير ومافي شي مخفي .
والطريق الرابع هو من المينا بفرنسا مدينة كاليه او غيرها انت لحالك تحاول تنط ع السور تبع المينا وتتخبى تحت شي شاحنة وتمرق ع دوفر .
او تشفلك شي بارك موقف شاحنات قريب من المينا تتسلل عليه بالليل وتتخبى جوات شاحنة او تحتها بالدنكل فوق الدولاب الوسطاني من الثلاث الخلفية .اللجوء الى بريطانيا "

فيها خطورة الموت لاسمح الله وهناك ناس ماتت كانت ضعيفة البنية وطنطاط خخخخخ
أنا الحمدلله مرقت ببلاش في خطة محكمة نطيت ع السور في لحظة كان قدامي ناطين شخصين قلت خلينا نجرب من اول محاولة نط والحمدلله اتشتت الشرطة باللحاق فينا ومرقت أنا واتخبيت في منطقة حتى امتلت الساحة بالشاحنات وطلعت في وحدة وتوجهت ساوي ع الباخرة من غير تفتيش الحمدلله بعد ماضليت بكاليه ١٧ يوم عيشة بتخليك تكره اروبا من قلة الاكل والروائح والزبايل والنشح في مخيم الاجئين في كاليه .

المخيم يضم الف وخمسمية شخص من جنسيات أفريقية واسيوية والسوريين مابيتعدو تلاتين شخص كل يوم بيمرق وأحد وبيجي واحد .
هدمت السلطات الفرنسية علينا الخيم وانتقنا لساحة السلام قريبة من المكان القديم منذ شهر ونصف وبيننا خيمة كبيرة أنا وعشر شباب وصار كل شخص سوري جديد يجي لعنا كانه الخيمة مشاع الله وكيلكن خمسة وعشرين شخص في خيمة لا تتجاوز اربعة أمتار بأربعة .

مانطول عليكن بالسيرة وصلنا وسلمت حالي للبوليس جابولي مترجم عربي وطلبت اللجوء وبنفس اليوم نقلوني من مركز الشرطة لكامب أعطوني غرفة وملابس وأدوات نظافة وأكل ودخان وتلفزيون وبلياردو ومكتبة وبلاوي زرقا عيشة خمس نجوم .
بعد اربع ايام نقلوني لمدينة وكامب تاني بمواصفات ونظافة اكتر من الاول .اللجوء الى بريطانيا "

جلست فيه تلات ايام وتم فرزي لمدينة جلاسكو واعطوني غرفة لحالي مع شب تاني في نفس الشقة وكل يوم خمسة بوند مع ادوات النظافة واللباس والشراشف وهالامور كلها مجهزة .

بعد ١٨ يوم تم نقلي لبيت تاني أنظف من الاول مهئ بكامل متطلبات المعيشة من فرن الكهربا الى غسالة الصحون .

هون اذا عمرك فوق ٣٨ بتاخد كل يوم عشرة بوند واذا عمرك فوق ٢٥ بتاخد ثمانية بوند واذا تحت ٢٥ بتاخد خمسة بوند وكل فترة بيبعتولك راتبك ع البريد البوست اوفيس وبس طلعت الاقامة بتزيد شوي المبالغ وطبعا مابتوفر منها شي لانها للأكل والشرب مو للبعزقة او تعملي شاطر وكحتة توفر منها وتفضحنا تاكل بالجامع ببلاش ..
المهم الاقامة من شهر ونص للثمان اشهر وسطيا حسب مايجي فرزك على اي مدينة وكل مدينة إلها ضغطها.

بيعطوك اوراق لإثبات شخصيتك وفيك تدرس بكولج او مدرسة قبل ماتحصل ع الاقامة .
وفيك تسافر وين مابدك في بريطانيا .
وبإمكانك تغير سكنك وتنقل ملفك لمدينة اخرى ولها شروط يجب تحقيقها 
بعد الحصول ع الاقامة والتي تتراوح من تلات سنين إقامة حماية الى خمس سنين لاجئ سياسي واغلب السوريين عم ياخدو خمسة .

بعد الاقامة فيك تشتغل والرواتب تسعة بوند للساعة وسطيا للعمل البسيط مثل عامل مطعم.

بعد الاقامة بإمكانك تقدم ع وثيقة سفر تشبه الجواز السفر البريطاني بالدول يلي يحق لحامله السفر عليها ولكن لونه ازرق ولا يحق لك السفر الى سوريا يستغرق اربع شهور وسطيا  . اللجوء الى بريطانيا "

»
السابق
رسالة أقدم
«
التالي
رسالة أحدث